Waqt e rukhsat baap ko betay ka murr kar dekhna

Karbala ab intehaye sabr e Sarwar dekhna

Door tak jatay huay dekha kiye kaise Hussain

Thokarain kha kha ke khud sambhla kiye kaise Hussain

Ay Ali Akbar zara peechay palat kar dekhna

Maa kay armaano ki chadar ka amama sar pe hai

Fatima Sughra ki aankhon ka ujala sar pe hai

Bigrega ek pal may kitnon ka muqaddar dekhna

Dosh par bikhri hui zulfein urati thi hawa

Bikhri zulfon se nikharti ja rahi thi karbala

Maut ki jurrat nahi thi aankh bharkar dekhna

Uth raha hai gir raha hai ek parda baar baar

Umme Laila ka ye khaima hai mere parwardigar

Laash jab aayi to mar jaayegi madar dekhna

Haye maqtal ghutniyon ke bal chala hai ek pidar

Kehta hai aawaz de mujhko mere noor e nazar

Khogayi beenayi meri mere dilbar dekhna

Ay Hussain ibne Ali jaao na Akbar ke qareeb

Zulm aisa hogaya hai taab la sakte nahi

Kya gawara hai sina seenay ke andar dekhna

Imtihan hai burhay kandho ka jawan bete ki laash

Khoon mein doobi kis tarha dekhegi ma bete ki laash

Is jagah aulad walon khud ko rakh kar dekhna

Marte dam Akbar ko dar hai maa na aajaye kahin

Beh raha hai khoon mere seene se rangeen hai zameen

Kehdo amma se mujhe yun na tarap kar dekhna

Baba meri maa mere gham ko utha sakti nahin

Neend aisi aa rahi hai maa jaga sakti nahi

Zakhm mera maa ki nazron se bacha kar dekhna

Khoon hota hai jigar rehan o sarwar us ghari

Sochte hai hazrat e Shabbir ki jab bekasi

Baap ka ruk ruk ke aur bete ka murr kar dekhna