Koi ghaibat may baitha khoon kay aansoo bahata hai

Usay Zainab ka jab bazaar jaana yaad aata hai

Koi ghamkhuar ghaibat may mayassar hi nahi usko

So tanhayi may har nauha wo khud ko hi sunaata hai

Unhi galiyon may chal chal kar jahan chalti rahi Zainab

Nishan Zainab ke qadmo ke wo haathon se mitata hai

Baqaiye may sadaye wa Hussaina goonj uthti hai

Wo jab bhi qabr e Zehra aa kay seene se lagata hai

Nahi thamtay hain uski aakh se aansu kisi soorat

Usay baysheer ka jab muskurana yaad aata hai

Pidar ki goud ki khaatir Sakina jab bhi roti hai

Wo lori baap ke lehje may beti ko sunaata hai

Khayaal aata hai jab bhi parda e Zainab ka Mehdi ko

Kabhi talwaar par wo haath rakhta hai hatata hai

Wo Hujjat hai usi ka kaam hai is dard ko sehna

Kisi khaaki kay dil me jaun ye gham kab samaata hai