Bolay padar se Akbar barchi na khenchna

Hai jaan ab labon par barchi na khenchna

Baba nazar ko phayr lo dum tootne laga

Barchi ke phal se khoon hai dil ka ruka hua

Ublega khoon zameen par barchi na khenchna

Maine tumhay bulaaya tha taake mai keh sakun

Bilkul na gham karo mere dil ko hai ab sukoon

Baithe raho yahan magar barchi na khenchna

Amma ko ye khabar na ho mere sina lagi

Ghash aagaya hai bas zara shiddat thi pyas ki

Mai aa raha hun jao ghar barchi na khenchna

Bolay Hussain baap ko behla rahe hain aap

Maloom hai ke yan se kahan ja rahe hain aap

Kehte ho mu ko phayr kar barchi na khenchna

Saansein ukhar rahi to madham hai nabz bhi

Karte ho aah humko hai taqeed sabr ki

Kehte ho thaam ke jigar barchi na khenchna

Akbar pukare baap se dil ko sambhaliye

Tooti sina kaleje may rehne hi dijiye

Niklega saath may jigar barchi na khenchna

Maula ne ya Ali kaha dil ko sambhaal kar

Phir khud hi larkhara gaye barchi nikaal kar

Kehta raha jawan pisar barchi na khenchna

Rehan saath barchi ke dil bhi nikal para

Parhte rahe Hussain bhi ta dayr marsiya

Maa kehti aayi nange sar barchi na khenchna